វឿន វាសនា បង្កើតប្រវត្តិសាស្ត្រ ក្លាយជាកីឡាករដំបូងគេដែលរកបានលើស ១,០០០ ពិន្ទុនៅលីគបាល់ទះតៃវ៉ាន់

កីឡាករបាល់ទះកម្ពុជា វឿន វាសនា កំពុងបង្កើតប្រវត្តិសាស្ត្រថ្មីនៅលើឆាកអន្តរជាតិ បន្ទាប់ពីក្លាយជាកីឡាករដំបូងគេក្នុងលីគបាល់ទះអាជីព តៃវ៉ាន់ (TPVL) ដែលអាចរកបានពិន្ទុលើសពី 1,000 ពិន្ទុ ក្នុងមួយរដូវកាល។

កីឡាករវ័យ 25 ឆ្នាំ មកពីខេត្តបាត់ដំបងរូបនេះ បច្ចុប្បន្នកំពុងលេងឱ្យក្រុម Win Streak ហើយនៅរដូវកាល 2025-2026 គេរកបានរហូតដល់ 1,028 ពិន្ទុ ដែលជាកំណត់ត្រាថ្មីមួយក្នុងប្រវត្តិសាស្ត្រលីគ។ សមិទ្ធផលនេះ កើតឡើងបន្ទាប់ពីគេបានជួយក្រុមឈ្នះ 2 ប្រកួតជាប់គ្នា ក្នុងសប្តាហ៍ទី 26 ដោយរកបាន 31 ពិន្ទុ ទល់នឹង TSG Skyhawks និង 24 ពិន្ទុ ទល់នឹង Taoyuan Cloud Leopard។

មិនត្រឹមតែបំបែកកំណត់ត្រាផ្ទាល់ខ្លួនប៉ុណ្ណោះទេ វឿន វាសនា ក៏បានដើរតួនាទីយ៉ាងសំខាន់ ក្នុងការជួយក្រុម Win Streak ឈរនៅកំពូលតារាង Regular Season ផងដែរ ក្រោយឆ្លងកាត់ 48 ប្រកួត, ឈ្នះដល់ 43 ប្រកួត និងចាញ់ត្រឹម 5 ប្រកួត ប៉ុណ្ណោះ។

សម្រាប់ការប្រកួត Playoffs ដើម្បីស្វែងរកក្រុមជើងឯកលីគរដូវកាលនេះ នឹងចាប់ផ្តើមពីថ្ងៃទី 22 ដល់ 25 ខែឧសភា ឆ្នាំ 2026 ហើយអ្នកគាំទ្រកម្ពុជាជាច្រើនកំពុងរង់ចាំមើលថា តើ វឿន វាសនា អាចបន្តសរសេរប្រវត្តិសាស្ត្រថ្មី និងនាំក្រុមទៅកាន់ជើងឯកបានដែរឬទេ។