Controversial Decision! FIFA រងការរិះគន់ខ្លាំង ក្រោយប្រកាសហាមអ្នកគាំទ្រយកដបទឹកចូលកីឡដ្ឋាន មុន FIFA World Cup 2026
អត្ថបទសរសេរដោយ Danny • 3 views
ស្ថាប័នគ្រប់គ្រងបាល់ទាត់ពិភពលោក (FIFA) កំពុងរងការរិះគន់យ៉ាងខ្លាំងពីសំណាក់អ្នកគាំទ្របាល់ទាត់ជុំវិញពិភពលោក បន្ទាប់ពីបានផ្លាស់ប្តូរគោលនយោបាយដ៏សំខាន់មួយ ត្រឹមតែប៉ុន្មានថ្ងៃមុនការចាប់ផ្តើមព្រឹត្តិការណ៍ FIFA World Cup 2026។
យោងតាមការប្រកាស និងការផ្ញើអ៊ីមែលជូនដំណឹងថ្មីទៅកាន់អ្នកគាំទ្រ បានបញ្ជាក់ថា ចាប់ពីថ្ងៃទី ២ ខែមិថុនា តទៅ អ្នកទស្សនានឹងមិនត្រូវបានអនុញ្ញាតឱ្យយកដបទឹកដែលអាចប្រើឡើងវិញបាន ចូលទៅក្នុងកីឡដ្ឋាននានាដែលរៀបចំការប្រកួត World Cup នៅសហរដ្ឋអាមេរិក កាណាដា និងម៉ិកស៊ិកឡើយ។ ការសម្រេចចិត្តនេះ បានធ្វើឱ្យអ្នកគាំទ្រជាច្រើនមានការភ្ញាក់ផ្អើល និងខឹងសម្បារយ៉ាងខ្លាំង ព្រោះកាលពីប្រមាណបីសប្តាហ៍មុន FIFA នៅតែបញ្ជាក់នៅក្នុងបទប្បញ្ញត្តិផ្លូវការថា អ្នកទស្សនាអាចយកដបប្លាស្ទិកថ្លាដែលគ្មានទឹក និងមានចំណុះមិនលើស ១ លីត្រ ចូលទៅបំពេញទឹកនៅតាមកន្លែងផ្តល់ទឹកសាធារណៈក្នុងកីឡដ្ឋានបាន។
ជុំវិញបញ្ហានេះ FIFA បានបកស្រាយថា ការហាមឃាត់ដបទឹក គឺធ្វើឡើងដើម្បីហេតុផលសុវត្ថិភាព និងកាត់បន្ថយហានិភ័យនៃការរងរបួសចំពោះកីឡាករ ក៏ដូចជាអ្នកចូលរួមទស្សនា។ ដើម្បីទប់ទល់នឹងអាកាសធាតុក្តៅខ្លាំងក្នុងរដូវក្តៅរបស់ទ្វីបអាមេរិកខាងជើង FIFA បានសហការជាមួយគណៈកម្មាធិការម្ចាស់ផ្ទះរៀបចំវិធានការជំនួយដូចជា តំបន់បាញ់អ័ព្ទទឹក តង់ត្រជាក់ កង្ហារខ្យល់ និងកន្លែងផ្តល់ជាតិទឹកផ្សេងៗ។ យ៉ាងណាមិញ ក្រុមតំណាងអ្នកគាំទ្រដូចជា Football Supporters’ Association និងក្រុមអ្នកគាំទ្រអង់គ្លេស Free Lions បានរិះគន់តាមបណ្ដាញសង្គម X ថា FIFA កំពុងដាក់ផលប្រយោជន៍ពាណិជ្ជកម្ម និងការលក់ទឹកដបក្នុងកីឡដ្ឋាន ឱ្យនៅពីមុខសុខុមាលភាព និងសុខភាពរបស់អ្នកគាំទ្រទៅវិញ។
