Julián Álvarez ចង់ចាកចេញពី Atlético Madrid? ខ្សែប្រយុទ្ធអាហ្សង់ទីនរូបនេះ បើកចិត្តចំពោះការផ្ទេរទៅ Barcelona, Arsenal FC និង Paris Saint-Germain
អត្ថបទសរសេរដោយ Danny • 5 views
Julian Alvarez ត្រូវបានរាយការណ៍ថា បានប្រាប់ទៅកាន់ Atletico Madrid រួចហើយថា គេចង់ចាកចេញពីក្លឹបនៅរដូវក្តៅនេះ បន្ទាប់ពីបដិសេធកុងត្រាថ្មីដ៏ធំមួយពីក្លឹប។ ខ្សែប្រយុទ្ធជម្រើសជាតិ អាហ្សង់ទីន រូបនេះ ត្រូវបានគេយល់ថា កំពុងស្វែងរកគម្រោងដែលមានឱកាសឈ្នះពានធំៗច្រើនជាងមុន ខណៈ Barcelona, Arsenal និង PSG សុទ្ធតែចាប់អារម្មណ៍លើគេ។
ការសម្រេចចិត្តរបស់ Alvarez បានធ្វើឲ្យមានការភ្ញាក់ផ្អើលយ៉ាងខ្លាំងនៅកីឡដ្ឋាន Metropolitano ព្រោះ Atletico Madrid បានផ្តល់កុងត្រាថ្មីដែលនឹងធ្វើឲ្យគេក្លាយជាកីឡាករប្រាក់ខែខ្ពស់បំផុតក្នុងក្រុមរបស់ Diego Simeone ដោយអាចរកបានប្រហែល ១០ លានអឺរ៉ូក្នុងមួយរដូវកាល។
ទោះយ៉ាងណា ម្ចាស់ជើងឯក World Cup រូបនេះ ហាក់មិនទាន់ជឿជាក់លើទិសដៅរបស់ Atletico Madrid ទៀតឡើយ។ កុងត្រាបច្ចុប្បន្នរបស់គេមានរហូតដល់ឆ្នាំ ២០៣០ និងមានតម្លៃផ្តាច់កុងត្រាដល់ទៅ ៥០០ លានអឺរ៉ូ ប៉ុន្តែការបដិសេធកុងត្រាថ្មីបង្ហាញថា ចិត្តរបស់គេកំពុងសម្លឹងរកអនាគតថ្មី។
យោងតាមសារព័ត៌មាន Marca បានឲ្យដឹងថា Alvarez ចង់សាកល្បងខ្លួនក្នុងគម្រោងដែលមានឱកាសឈ្នះពានធំៗខ្ពស់ជាងនេះ។
ទោះមានការចាប់អារម្មណ៍ពីក្លឹបធំៗនៅ Premier League និង Ligue 1 ក៏ដោយ Alvarez ត្រូវបានគេរាយការណ៍ថា កំពុងផ្តោតចិត្តលើការផ្ទេរទៅ Barcelona។
អតីតខ្សែប្រយុទ្ធរបស់ Manchester City រូបនេះ ត្រូវបានគេនិយាយថា ចាប់អារម្មណ៍ខ្លាំងលើគម្រោងរបស់ Barcelona ហើយសុខចិត្តបោះបង់តួនាទីជាតារាសំខាន់នៅ Atletico Madrid ដើម្បីលេងជាមួយ Lamine Yamal និង Raphinha នៅកីឡដ្ឋាន Spotify Camp Nou។
ការចង់ចូលរួមជាមួយ “គម្រោងខ្លាំងជាងមុន” នេះ បានធ្វើឲ្យថ្នាក់ដឹកនាំ Atletico មានអារម្មណ៍ខកចិត្តយ៉ាងខ្លាំង មុនទីផ្សារដោះដូរកីឡាករបើក។
នៅពេលត្រូវសួរអំពីអនាគតរបស់ Alvarez គ្រូបង្វឹក Diego Simeone បានឆ្លើយយ៉ាងសាមញ្ញថា៖
“អនាគតរបស់ Julian? វាជាសំណួរសម្រាប់គេ។ ខ្ញុំគិតថាគេមានការសម្រេចចិត្តរួចហើយ”។
ទោះបី Atletico Madrid មិនចង់បាត់បង់ខ្សែប្រយុទ្ធសំខាន់របស់ខ្លួនក៏ដោយ ពួកគេក៏បានបញ្ជាក់ទៅភ្នាក់ងាររបស់កីឡាករ Fernando Hidalgo ថា ពួកគេនឹងពិចារណាលក់ លុះត្រាតែមានសំណើលើស ១៥០ លានអឺរ៉ូប៉ុណ្ណោះ។
បញ្ហាធំសម្រាប់ Barcelona គឺស្ថានភាពហិរញ្ញវត្ថុរបស់ក្លឹប ដែលអាចធ្វើឲ្យការផ្ទេរនេះពិបាកកើតឡើង។
ខណៈនេះ ក៏មានការខកចិត្តខ្លះៗនៅក្នុង Atletico Madrid ចំពោះឥទ្ធិពលរបស់ភ្នាក់ងារកីឡាករ ដែលត្រូវបានគេជឿថា កំពុងជួយជំរុញឲ្យមានការផ្ទេរចេញពីក្លឹប។
ទោះមានរឿងរ៉ាវផ្ទេរជាច្រើនក៏ដោយ ទំនាក់ទំនងរវាង Alvarez និង Simeone នៅតែល្អប្រសើរ។ រដូវកាលនេះ Alvarez រកបានជាង ២០ គ្រាប់ និងនៅតែទទួលបានទំនុកចិត្តពីគ្រូបង្វឹករបស់គេ ទោះមានពេលមួយដែលគេមិនអាចរកគ្រាប់បាល់បានអស់រយៈពេល ៤ ខែ។
ប៉ុន្តែជាមួយការចាប់អារម្មណ៍ពី Arsenal និង PSG ផងដែរ Atletico Madrid អាចនឹងពិបាកក្នុងការរក្សាទុកកីឡាករដែលកំពុងសម្លឹងទៅរកច្រកចេញរូបនេះ។
