Lamine Yamal ឌឺដងទៅកាន់ Jude Bellingham ក្រោយ Barcelona យកឈ្នះ Real Madrid និងលើកពាន La Liga
អត្ថបទសរសេរដោយ Danny • 5 views
ក្រោយជួយ Barcelona យកឈ្នះ Real Madrid ២-០ ក្នុងការប្រកួត El Clasico និងធានាជើងឯក La Liga បានសម្រេច កីឡាករវ័យក្មេង Lamine Yamal បានក្លាយជាចំណាប់អារម្មណ៍ធំមួយទៀត ក្រោយបង្ហោះសារឌឺដងទៅកាន់ Jude Bellingham នៅលើបណ្ដាញសង្គម។
តារាវ័យ ១៨ឆ្នាំរូបនេះ បានបង្ហោះវីដេអូអបអរគ្រាប់បាល់របស់ Ferran Torres នៅលើ Instagram Story របស់ខ្លួន ដោយសរសេរពាក្យថា "talk is cheap" មានន័យថា និយាយច្រើនមិនសំខាន់ទេ សំខាន់លទ្ធផល ដែលជាពាក្យធ្លាប់ត្រូវបាន Bellingham ប្រើកាលពីដើមរដូវកាល។ មិត្តរួមក្រុម Gavi ក៏បានចែករំលែកសារនោះបន្តផងដែរ ដែលបង្ហាញថាកីឡាករ Barcelona មិនទាន់ភ្លេចរឿងចាស់ឡើយ។
ជម្លោះរវាងកីឡាករទាំងពីរបានចាប់ផ្តើមតាំងពីខែតុលា ក្រោយ Real Madrid យកឈ្នះ Barcelona ២-១ នៅ Santiago Bernabeu។ ក្រោយការប្រកួតនោះ Bellingham បានបង្ហោះសារថា "Talk is cheap. Hala Madrid always" ដែលមនុស្សជាច្រើនយល់ថាជាការឆ្លើយតបទៅកាន់ Yamal។
មុនការប្រកួតនោះផងដែរ Yamal ធ្លាប់បង្កភាពចម្រូងចម្រាសដោយនិយាយថា Real Madrid “បានផលចំណេញពីការកាត់សេចក្ដី” ដើម្បីឈ្នះ ដែលធ្វើឱ្យកីឡាករជាច្រើននៅក្រុមរបស់ Madrid មិនពេញចិត្ត។
យ៉ាងណាមិញ នៅយប់ដ៏អស្ចារ្យនៅ Camp Nou នេះ Barcelona បានយកឈ្នះ ២-០ ដោយគ្រាប់បាល់ពី Marcus Rashford និង Ferran Torres ដើម្បីលើកពាន La Liga ជាលើកទី២ជាប់គ្នាក្រោមការដឹកនាំរបស់ Hansi Flick ខណៈ Real Madrid បញ្ចប់រដូវកាលដោយគ្មានពានរង្វាន់។
