Liverpool FC ទាក់ទងទៅកាន់ Real Madrid ដើម្បីសួរព័ត៌មានអំពី Xabi Alonso
អត្ថបទសរសេរដោយ Danny • 5 views
ក្លិប Liverpool FC ត្រូវបានរាយការណ៍ថាបានទាក់ទងទៅកាន់ Real Madrid ដើម្បីសួរព័ត៌មានអំពីអតីតខ្សែបម្រើរបស់ពួកគេ Xabi Alonso ខណៈឈ្មោះរបស់គេកំពុងត្រូវបានភ្ជាប់ជាមួយតំណែងអ្នកចាត់ការថ្មីនៅ Anfield។
យោងតាមសារព័ត៌មាន AS ក្លិបយក្សអង់គ្លេសមួយនេះចង់ដឹងពីមូលហេតុដែលធ្វើឱ្យការដឹកនាំរបស់ Alonso នៅ Real Madrid មិនទទួលបានជោគជ័យ ដើម្បីវាយតម្លៃថាតើគេអាចក្លាយជាជម្រើសសមស្របសម្រាប់ជំនួស Arne Slot ឬអត់។
បើទោះបីជា Slot ធ្លាប់ដឹកនាំ Liverpool ឈ្នះពានលីគអង់គ្លេសក្នុងរដូវកាលដំបូងរបស់គេក៏ដោយ ប៉ុន្តែរដូវកាលនេះក្រុមបានធ្លាក់ទម្រង់យ៉ាងខ្លាំង។ Liverpool ត្រូវបានទម្លាក់ចេញពីពាន Champions League, FA Cup និង League Cup យ៉ាងឆាប់រហ័ស ហើយថែមទាំងដាច់ពិន្ទុពីកំពូលតារាង Premier League ដល់ទៅ 20 ពិន្ទុផងដែរ។
ស្ថានភាពនេះបានធ្វើឱ្យមានការរិះគន់យ៉ាងខ្លាំងទៅលើ Slot និងរបៀបលេងរបស់គេ ខណៈសារព័ត៌មានអង់គ្លេសជាច្រើនបានអះអាងថា Liverpool កំពុងពិចារណាប្តូរអ្នកចាត់ការ។
ចំពោះ Xabi Alonso វិញ មានរបាយការណ៍ជាច្រើនបង្ហាញថាគេធ្លាប់មានបញ្ហាជាមួយកីឡាករមួយចំនួននៅក្នុងបន្ទប់ផ្លាស់សម្លៀកបំពាក់របស់ Real Madrid។ កីឡាករដូចជា Vinicius Junior និង Fede Valverde ត្រូវបានគេរាយការណ៍ថាមិនពេញចិត្តចំពោះវិធីសាស្ត្របង្វឹករបស់គេ
ជាពិសេសការបង្រៀនតាក់តិចលម្អិត និងការវិភាគវីដេអូរយៈពេលវែង។
ទោះជាយ៉ាងណា ក៏មានកីឡាករមួយចំនួនគាំទ្រគំនិតរបស់ Alonso ផងដែរ ដោយពួកគេជឿថាគេចង់ផ្លាស់ប្តូរប្រព័ន្ធលេងរបស់ក្រុមឱ្យកាន់តែប្រសើរ។
របាយការណ៍ខ្លះថែមទាំងអះអាងថា មានកីឡាករមួយចំនួនបង្ហាញអាកប្បកិរិយាមិនគោរព ដោយធ្វើជាគេង និងនិយាយគ្នាខណៈ Alonso កំពុងពន្យល់តាក់តិច។ ស្ថានភាពនេះបានធ្វើឱ្យគ្រូបង្វឹកសញ្ជាតិអេស្ប៉ាញរូបនេះខឹងយ៉ាងខ្លាំង ហើយគេត្រូវបានរាយការណ៍បានស្រែកថា៖ “ខ្ញុំមិនគិតថាខ្ញុំកំពុងចូលមកក្នុងកន្លែងមើលថែកុមារនោះទេ!”។
