វីរបុរស Chelsea លោក John Terry សម្តែងការមិនពេញចិត្តចំពោះបញ្ជីកីឡាកររបស់ Thomas Tuchel
អត្ថបទសរសេរដោយ Danny • 4 views
អតីតប្រធានក្រុមដ៏មានឥទ្ធិពលរបស់តោខៀវ Chelsea និងក្រុមជម្រើសជាតិតោខំណាចអង់គ្លេស (England) លោក John Terry បានចេញមុខបង្ហាញការព្រួយបារម្ភ និងរិះគន់យ៉ាងខ្លាំងៗទៅលើគ្រូបង្វឹកលោក Thomas Tuchel ចំពោះការសម្រេចចិត្តជ្រើសរើសបញ្ជីឈ្មោះកីឡាករ ២៦ នាក់ចុងក្រោយសម្រាប់យុទ្ធនាការ FIFA World Cup 2026។
នៅក្នុងកិច្ចសម្ភាសន៍ក្នុងកម្មវិធី Sports Uncensored លោក Terry បានបង្ហើបថា ទោះបីជាលោកគោរពស្ញប់ស្ញែងចំពោះសមិទ្ធផលកន្លងមករបស់លោក Tuchel ក៏ដោយ ប៉ុន្តែលោកជឿជាក់ថាគ្រូបង្វឹកសញ្ជាតិអាល្លឺម៉ង់រូបនេះ បានបង្កើតកំហុសឆ្គងដ៏ធំមួយក្នុងការទុកចោលកីឡាករសំខាន់ៗដែលមានបទពិសោធន៍ខ្ពស់។ លោកបានសង្កត់ធ្ងន់ថា៖ «នៅក្នុងព្រឹត្តិការណ៍ World Cup អ្នកត្រូវការកីឡាករដែលល្អបំផុត។ នៅពេលខ្ញុំក្រឡេកមើលទៅបញ្ជីឈ្មោះបច្ចុប្បន្ន គឺមានកីឡាករត្រឹមតែ ១៣ ទៅ ១៥ នាក់ប៉ុណ្ណោះ ដែលខ្ញុំមើលឃើញថាអាចដើរតួជាកម្លាំងស្នូល បើសិនជាអង់គ្លេសចង់ឈ្នះពានរង្វាន់ពិភពលោក»។
ចំណុចដែលធ្វើឱ្យលោក John Terry ភ្ញាក់ផ្អើល និងទាស់ចិត្តខ្លាំងបំផុតនោះ គឺការអវត្តមានរបស់ខ្សែការពារចាស់វស្សា Harry Maguire និង Luke Shaw ដោយលោកយល់ថា កីឡាករវ័យក្មេងជំនាន់ក្រោយដូចជា Nico O'Reilly ជាដើម ត្រូវការបង្អែក និងការណែនាំពីកីឡាកររៀមច្បងដែលមានបទពិសោធន៍ជោគជាំនៅក្នុងបន្ទប់ផ្លាស់ប្តូរសម្លៀកបំពាក់អំឡុងព្រឹត្តិការណ៍សម្ពាធធំៗបែបនេះ។ លើសពីនេះ លោកក៏បានចោទសួរពីការខកខានមិនបានហៅកីឡាករដែលអាចផ្លាស់ប្តូរការប្រកួតបានដូចជា Cole Palmer ផងដែរ។ នៅក្នុងព្រឹត្តិការណ៍ World Cup 2026 នេះ អង់គ្លេសត្រូវប្រកួតកម្តៅសាច់ដុំចុងក្រោយជាមួយកូស្តារីកា (Costa Rica) មុនពេលត្រូវចូលរួមប្រកួតផ្លូវការក្នុងពូល Group L ជាមួយក្រូអាត (Croatia), ហ្គាណា (Ghana) និងប៉ាណាម៉ា (Panama)។
