សញ្ញាព្រមានទៅកាន់គូប្រជែង! Lionel Messi ស៊ុតបំបែកកំណត់ត្រាប្រវត្តិសាស្ត្រក្នុងប្រកួតកម្តៅសាច់ដុំ មុនពេលបេសកកម្មការពារតំណែងជើងឯក World Cup

ស្តេចបាល់ទាត់ Lionel Messi បានបង្ហាញក្តីរំភើប និងទំនុកចិត្តយ៉ាងខ្លាំងក្នុងការដឹកនាំក្រុមជម្រើសជាតិអាហ្សង់ទីន (Argentina) ដើម្បីការពារពានរង្វាន់ពិភពលោក បន្ទាប់ពីបានចូលលេងជាកីឡាករបម្រុង និងស៊ុតបញ្ចូលទីគ្រាប់បាល់ពិន័យប៉េណាល់ទី ក្នុងជ័យជម្នះ ៣-០ លើក្រុមអ៊ីស្លង់ (Iceland) ក្នុងប្រកួតមិត្តភាពចុងក្រោយបង្អស់។

គ្រាប់បាល់នេះមិនត្រឹមតែជួយឱ្យក្រុមទទួលបានជ័យជម្នះប៉ុណ្ណោះទេ ប៉ុន្តែវាបានធ្វើឱ្យខ្សែប្រយុទ្ធរបស់ក្លិប Inter Miami វ័យ ៣៨ ឆ្នាំរូបនេះ បង្កើតប្រវត្តិសាស្ត្រថ្មីជា «កីឡាករវ័យចំណាស់ជាងគេបង្អស់ដែលស៊ុតបញ្ចូលទីឱ្យអាហ្សង់ទីន» ដោយបានទម្លាក់កំណត់ត្រាចាស់របស់វីរបុរសលោក Ángel Labruna ដែលបានរក្សាទុកអស់រយៈពេលជាង ៦ ទសវត្សរ៍។ ក្រៅពីនេះ វាក៏ជាការបង្ហាញខ្លួនលើកទី ១៩៩ របស់គេ និងជាគ្រាប់បាល់អន្តរជាតិទី ១១៧ ផងដែរ។ ក្រោយបញ្ចប់ការប្រកួត Messi បានប្រាប់ប្រភព TyC Sports ថា៖ «ខ្ញុំមានអារម្មណ៍ល្អណាស់ ហើយវាជារឿងសំខាន់ក្នុងការចូលរួមព្រឹត្តិការណ៍នេះដោយគ្មានភាពភ័យខ្លាច ឬការសង្ស័យលើកាយសម្បទា... វានឹងក្លាយជារឿងពិបាកខ្លាំងណាស់សម្រាប់គូប្រជែងក្នុងការយកឈ្នះយើង ព្រោះយើងជាក្រុមដែលមានការប្រកួតប្រជែងខ្ពស់»។

ទោះបីជាធ្លាប់ស្គាល់រសជាតិលើកពានរង្វាន់ពិភពលោកកាលពីនៅកាតារួចហើយក៏ដោយ ក៏ Messi បានសង្កត់ធ្ងន់ថា ស្មារតីចង់ឈ្នះរបស់ក្រុមកូនទាហានលោក Lionel Scaloni នៅតែខ្លាំងក្លាដូចដើម។ បច្ចុប្បន្ន ក្រុមមេឃខៀវអាហ្សង់ទីនកំពុងតែត្រៀមខ្លួនយ៉ាងហ្មត់ចត់សម្រាប់ការប្រកួតបើកឆាកជាផ្លូវការនៅក្នុងព្រឹត្តិការណ៍ FIFA World Cup 2026 ដោយត្រូវប្រឈមមុខជាមួយក្រុមអាល់ហ្សេរី (Algeria)។